İşğal etilgen Qırım akimiyeti bildirdi ki, 2014 senesi sentâbr 28-de Aqmescit civarındaki Kezlev ve Nikolayevka yollarını birleştirgen yol qısmında yüz bergen omrav yerinde tamir işleri başlandı.
Lâkin yanvar 27-de Qırım.Aqiqat mühbirleri anda barıp, bekçiden ğayrıdan başqa bir şey körmediler. Mahsus tehnika ve donatmalar bile yoq, yalıñız ışıq generatorı bar edi.
Quruyıcılar gruppasınıñ reberi kelip, «tamir işleri keçirilgenini» bildirdi, lâkin izaatlardan vazgeçti.
Qırımnıñ naqliyat «naziri» Anatoliy Tsurkin «Rossiya segodnâ» radiosınıñ yayınında dedi ki, omrağan yol yerinde tamir işleri Taqiqat komitetiniñ izni ile keçirile.
Onıñ aytqanına köre, geodeziya ve geologiya tedqiqleri keçirildi.
«Rossiyskaya gazeta» yaza ki, omrav yeri yanında qurucılar şeerçigi tiklenildi.
Tsurkin bildirdi ki, Aqmescitniñ aylanma yolu yazğa qadar tamir etilecek. Onıñ qayd etkenine köre, işbu obyektniñ baş şirketi «Yujdorstroy» faciadan soñ işlerde iştirak etmeycek. Yolnı ise «Krımavtodor» şirketi ğayrıdan tikleycek.
Cinaiy işniñ taqiqatı bitken soñ qazadan olğan maddiy zarar şirketten alınacaq.
Hatırlatamız, 2014 senesi sentâbr 28-de yerli saatke köre saat 3.30 aylanma yolunıñ bir qısmı omradı. Yolda çuqur peyda oldı. Bir maşina çuqurğa tüşti. Yol qazası neticesinde altı insan, şu cümleden eki bala elâk oldı. Daa eki bala ağır yaralandı. Facia sebebinden cinaiy iş açıldı.
