Link açıqlığı

Qırımnıñ tibbiy universitet rektorını «söz diñlemegeninden sebep» işten boşattılar


İşğal etilgen Qırımda Georgiyevskiy adına Qırım devlet tibbiy universitetiniñ rektorı Anatoliy Babaninni işten boşattılar. Bunı Vernadskiy adına Qırım federal universitetiniñ rektorı Sergey Doniç bildirdi, – dep haber ete «Krım Media».

Doniçniñ aytqanına köre, bu qarar Qırımnıñ öz başına ilân etilgen baş naziri Sergey Aksönov ve Qırım «spikeri» Vladimir Konstantinov ile subetten soñ qabul etildi.

Doniç bildirdi ki, keçken sene avgust 4-te Rusiye ükümeti tibbiy universitetniñ Qırım federal universitetiniñ terkibine kirmesi aqqında qabul etken qarar «Anatoliy Babanin tarafından uydurılğan şahsiy sebeplerden» yerine ketirilmey.

«(Babanin, – muar.) Qırımnıñ bazı siyasetçi ve memurlarınıñ qoltutuvına işanıp, Rusiye Federatsiyası ükümetiniñ qararını boykot ete, lâkin bu aslı olmaz. Bu sebepten vaqıt qalmadı, devlet reberliginiñ siyasetine zıt areket etken Qırım tibbiy universitetiniñ reberligine nisbeten faal adımlar atılmalı», – dep ayttı Qırım federal universitetiniñ rektorı.

Sergey Doniç dedi ki, rektornı deñiştirüv maqsadı – «aliy oquv yurtında vaziyetni eyileştirip, hadim ve ocalarına aylıq, studentlerge ise maaş bermektir».

Tibbiy universitetniñ yañı reberi tibbiy ilimler doktorı, oftalmolog Nana İvanova olacaq. Bundan evel o, oftalmologiya ve otolaringologiya kafedrasınıñ müdiri edi.

Malüm ki, işğal etilgen Qırımda studentler ve ocalar istemese de, Qırım tibbiy universitetini işğalci akimiyet tarafından qurulğan Federal universitet terkibine kirsettiler. Qırım tibbiy universitetiniñ reberligi Rusiye akimiyetiniñ qararına baqmadan, mustaqil bir aliy oquv yurtı olmağa qarar aldı.

XS
SM
MD
LG