Bağçasaray şeer şurası yanvar 27 künü keçirilgen toplaşuvda Bağçasaray şeer şurasınıñ reisi Sergey Kutayev, muavini Оleg Daperko, şeer memuriyetiniñ başı Yuriy Gulâyevniñ istifasını qabul etti, dep bildire Qırım akimiyetine yaqın olğan Krıminform saytı.
Neşirniñ malümatına köre, memurlar vazifelerinden öz istegi ile çıqmaq içün ariza yazğanlar.
Memurlarnıñ istifası qabul etilgeninden soñ, toplaşuvda teneffüs ilân etildi. Beklenilgeni kibi, yaqın zamanları Bağçasaray şeeriniñ yañı yolbaşçılığı teşkil etilecek.
Sergey Kutayev Bağçasaray şeer şurasınıñ reisi vazifesine sentâbr 27 künü tayinlendi. Aynı şu künü deputatlar onıñ muavini yerine Oleg Daperkonı ve Bağçasaray memuriyetiniñ başı vazifesine Yuriy Gulâyevni sayladılar.
