Qırımda bir yıl evelsi yerli deputalarnıñ 2014 senesi mart ayında Rusiye tarafından Qırım işğaline ketirgen qararları mecburiy olğanını tasdiqlağan delillerni «yoq eteler».
Bu fikrini Qırımtatar Milliy Meclis reisi Refat Çubarov bildire.
«2014 senesi fevral 26 künü mevzusı ile bir sırada, bu mevzu boyunca işğalci akimiyet endi bir qaç ay devamında çalışa, menimce, Qırım Muhtar Cumhuriyeti akimiyetiniñ vekilleri, şu cümleden QMC Yuqarı Şurasınıñ deputatları nişan altında qarar almağa mecbur olğanını tasdiqlağan bütün malümatnı «temizlemek» kibi acele avale berildi…», – yazdı o Facebookta.
İgor Girkin (Strelkov), Rusiye vatandaşı ve Kiyevde terroristik teşkilât olaraq tanılğan «DHC» yolbaşçılarından biri, «Neyromir-TV» Rusiye internet-telekanalında efirde bulunıp, Qırım Yuqarı Şurasınıñ deputatları Ukrainadan ayırıluvğa qol tutmağa mecbur olğanları aqqında bildirdi.
Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamenti divarları yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi. Hatırlatamız, 2014 senesi fevral 26 künü Qırım parlamenti divarları yanında Qırımnıñ ayırıluvına qol tutqanlar ve Ukraina birdemligi tarafdarları arasında muqavemet-mitingi keçirilgen edi. Ekinci tarafnıñ esas qısmı qırımtatarları edi.
