Link açıqlığı

Lilâ Bucurova: ATR telekanalı qırımtatarlar içün – ruhiy nimettir


ATR qırımtatar telekanalınıñ yolbaşçılığı ve icadiy taqımı Qırım işğalinden soñ qanuniyet çerçivesinde çalışıp, «er bir adımnı tüşünip etmege tırıştı», – dep bildirdi telekanalağa qol tutmaq içün kelgen qırımlılar ögünde çıqışta bulunıp, ATR qırımtatar telekanalınıñ haber siyaseti boyunca baş müdiriniñ muavini Lilâ Bucurova.

«Biz ögümizde olğan qanuniyet çerçivesinde areket etmege çalıştıq. Er bir adımımıznı, bizim içün ağır olsa da, biz tüşünip yapa edik. Maqsadımız tek bir – qırımtatar halqı içün qırımtatar telekanalını saqlamaqtır. Qırımtatarlar içün bu adiy haber alanı olmağanını añlap. Er birimiz bu kanalğa canımıznıñ bir köşeçigini bergenimizni añlap. Şimdi ayaqqa tura ekenmiz, tek Qırımğa degil de, bütün dünyağa: mındamız, Vatanımızda, sağmız, öz tilimizde laf etemiz», dep başladıq»,– dedi ATR qırımtatar telekanalınıñ haber siyaseti boyunca baş müdiriniñ muavini.

«Olar bizler içün – bir vaqıtları atta qırımtatar tilinde yırlap olamağan insanlar içün bunıñ emiyetini añlamaylar. Bazıda uzlaşmağa ketemiz – bazıda ğayet sıq uzlaşmağa ketemiz, açuvlatmayıq dep, amma içimiz qaynay. Qırımtatarlardan ruhiy nimetini almasınlar degen fikir ile bunı etemiz», – dep qayd etti Lilâ Bucurova.

Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamenti divarları yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.

Hatırlatamız, 2014 senesi fevral 26 künü Qırım parlamenti divarları yanında Qırımnıñ ayırıluvına qol tutqanlar ve Ukraina birdemligi tarafdarları arasında muqavemet-mitingi keçirilgen edi. Ekinci tarafnıñ esas qısmı qırımtatarları edi.

ATR qırımtatar telekanalınıñ haber siyaseti boyunca baş müdiriniñ muavini Lilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.

Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi. O, işbu vaqianı qırımtatarlarnı qorqutmaq içün bir usul olaraq adladı.

Qırımnıñ içki siyaset, informatsiya ve alâqalar «naziri» Dmitriy Polonskiy dedi ki, ATR qırımtatar telekanalınıñ reberleri ve jurnalistleri «kendi areketlerinden mesülietni akimiyetke qaldıracaq olalar».Qırım «prokurorı» Natalya Poklonskayanıñ aytqanına köre, tintüv taqiqatçınıñ qararı ile açılğan cinaiy iş çerçivesinde keçirildi.

ATR hadimlerini tintüv sabağa qadar süre bilecegi aqqında tenbiyelediler.

OSCE azatlıq meseleleri vekili Dunja Mijatović bazarertesi künü, yanvar 26-da, arbiylerniñ Qırımnıñ Aqmescit şeerinde yerleşken ATR yekâne qırımtatar telekanalına yapqan areketlerini takbih etti.

XS
SM
MD
LG