İşğal etilgen Aqmescitte «politsiya» hadimleri ATR qırımtatar telekanalınıñ muarririyetini terk etti. Qırım.Aqiqatqa berilgen malümatqa köre, muarririyet hadimleriniñ 2014 senesi fevral 26-da Qırım parlamenti yanında keçirilgen miting videoları alındı.
Tintüv bitken soñ ATR baş müdiri Elzara İslâmova telekanalğa qoltutmağa kelgen qırımlılarnıñ yanına çıqtı.
ATR baş müdiriniñ muavini Lilâ Bucurova Facebook saifesinde bildirdi ki, arbiyler arhiv malümatlarınen beraber qırımtatar muarririyet hadimleriniñ şahsiy malümatlarını da alıp kettiler.
«Saat 17:55 arbiyler avtomatları olğan erkeklernen beraber ATR telekanalını terk etip, arhivniñ bir qısmı ve hadimlerniñ şahsiy bilgisayarlarında olğan malümatnı alıp kettiler. Bu qıyın künde bizlernen beraber olğan, qoltutqan insanlar sağ olsun. Qoltutuvıñız bizge daa kerek olur, dep tüşünem», – dedi Bucurova.
Malüm olğanı kibi, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamentiniñ binası yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.
ATR qırımtatar telekanalı baş müdiriniñ informatsion siyaseti boyunca muavini Lilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.
Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi. O, işbu vaqianı qırımtatarlarnı qorqutmaq içün bir usul olaraq adladı.
Qırımnıñ içki siyaset, informatsiya ve alâqalar «naziri» Dmitriy Polonskiy dedi ki, ATR qırımtatar telekanalınıñ reberleri ve jurnalistleri «kendi areketlerinden mesülietni akimiyetke qaldıracaq olalar».
ATR hadimlerine tintüv sabağa qadar süre bilecegini ayttılar.
OSCE azatlıq meseleleri vekili Dunja Mijatović bazarertesi künü, yanvar 26-da, arbiylerniñ Qırımnıñ Aqmescit şeerinde yerleşken ATR yekâne qırımtatar telekanalına yapqan areketlerini takbih etti.
