ATR telekanalında tintüv keçirgen Rusiye arbiyleri baş müdir Elzara İslâmovnıñ jurnalistlerge bergen intervyüsını bozdılar. Telekanal hadimleri Qırım.Aqiqatqa bergen videoda körüne ki, adiy urbada eki adam ve mahsus urbada bir kişi ATR baş müdiriniñ yanına kelip, intervyü bermege keder eteler. Erkeklerden biri kamerağa sırtını çevirip, operatornıñ işini blok etti.
Qayd etmeli ki, muarririyette tintüv keçirgen arbiyler ATR qırımtatar telekanalınıñ reberlerini bile bilmeyler. Böylece, olardan biri telekanalnıñ baş müdiri Elzara İslâmovağa «müdiriñiz çağıra» dep, onı çetke çekecek oldı.
«Men izaatlar berem, bu menim aqqımdır», – dep cevap berdi İslâmova.
«Müdiriñiz kelmege rica etti», – dep daa bir kere tekrarladı erkek.
«Angi müdir? Kendim baş müdir olam», – dep ayttı ATR telekanalınıñ reberi.
Soñra erkekler intervyü bermek kerekmegenini bildirip, bu taqiqat tedbirleriniñ keçirilmesine keder ete, dep ayttılar.
«Şimdi mında taqiqat tedbirleri, olar bitken soñ intervyü bere bilesiñiz», – dep ayttı erkek kameranı qapatıp.
ATR baş müdiri Elzara İslâmovanıñ aytqanına köre, telekanaldaki tintüvni 2014 senesi fevral 26-da Qırım parlamentiniñ binası yanında keçirilgen mitingde eki insan ölümi ile bağlaylar.
«Sebebi 2014 senesi fevral 26-da keçirilgen mitingde eki insan ölümi aqqında cinaiy iş boyunca tintüv qararı oldı. Bizim taqiqat komitetine bermegen malümatımız bar deyler. Faqat yıl devamında farqlı organlardan muracaatlar kelgen edi, ve bir şey istegen olsalar, biz er daim malümat beremiz», – dep qayd etti İslâmova.
Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamentiniñ binası yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.
ATR qırımtatar telekanalı baş müdiriniñ informatsion siyaseti boyunca muavini Lilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.
Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi. O, işbu vaqianı qırımtatarlarnı qorqutmaq içün bir usul olaraq adladı.
Qırımnıñ içki siyaset, informatsiya ve alâqalar «naziri» Dmitriy Polonskiy dedi ki, ATR qırımtatar telekanalınıñ reberleri ve jurnalistleri «kendi areketlerinden mesülietni akimiyetke qaldıracaq olalar».
ATR hadimlerine tintüv sabağa qadar süre bilecegini ayttılar.
OSCE azatlıq meseleleri vekili Dunja Mijatović bazarertesi künü, yanvar 26-da, arbiylerniñ Qırımnıñ Aqmescit şeerinde yerleşken ATR yekâne qırımtatar telekanalına yapqan areketlerini takbih etti.
