ATR birinci qırımtatar telekanalı bir qaç saat devamında olmağan yayınnı ğayrıdan tikledi. Qırım.Aqiqat mühbiri bildire ki, al-azırda kanalnı uyduda ve ATR saytında da seyir etmek mümkün.
Kanalda başlağan tintüvlerden soñ onıñ analog signalı yoq oldı.
ATR baş müdiri Elzara İslâmova Facebook saifesinde bildirdi ki, Terrorizmge qarşı merkez ve Taqiqat komitetiniñ hadimleri tintüvge devam eteler.
Qırım.Aqiqat bildirgeni ki, yanvar 26-da telekanalğa kelgen arbiyler videoarhiv ile serverni tutıp aldılar.
Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamentiniñ binası yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.
ATR qırımtatar telekanalı baş müdiriniñ informatsion siyaseti boyunca muavini Lilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.
Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi. O, işbu vaqianı qırımtatarlarnı qorqutmaq içün bir usul olaraq adladı.
Qırımnıñ içki siyaset, informatsiya ve alâqalar «naziri» Dmitriy Polonskiy dedi ki, ATR qırımtatar telekanalınıñ reberleri ve jurnalistleri «kendi areketlerinden mesülietni akimiyetke qaldıracaq olalar».
