İşğal etilgen Aqmescitte «politsiya» hadimleri ATR qırımtatar telekanalınıñ binasına şirketke qoltutmaq içün kelgen adamlarnı evlerine yollaycaq olalar.
Qırım.Aqiqat mühbiri bildire ki, «politsiya» hadimleri toplaşqan adamlarğa qanun bozğanlarını bildirip, qanunsız miting içün 10-20 biñ rublelik para cezasını alacaqlarını aytalar.
Al-azırda ATR qırımtatar telekanalınıñ binası yanında tahminen yüz kişi toplaştı.
Qırım.Aqiqatnıñ malümatına köre, ATR qırımtatar telekanalınıñ muarririyetinde tintüv devam etmekte. Muarririyet hadimleriniñ şahsiy eşyaları baqıla, bilgisayarları alına. Arbiyler telekanal jurnalistleri çıqarğan video levhalarını da endireler. Bunıñnen beraber, 2014 senes fevral 26-da Qırım parlamentiniñ binası yanında keçirilgen miting süjetini de aldılar.
Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamentiniñ binası yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.
ATR qırımtatar telekanalı baş müdiriniñ informatsion siyaseti boyunca muavini Lilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.
Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi. O, işbu vaqianı qırımtatarlarnı qorqutmaq içün bir usul olaraq adladı.
Bir qaç saatten videoarhiv ile server tutıp alındı. Şimdilik efirni yalıñız telekanalnıñ saytında ve sputnik ağında seyir etmek mümkün.
Qırımnıñ içki siyaset, informatsiya ve alâqalar «naziri» Dmitriy Polonskiy dedi ki, ATR qırımtatar telekanalınıñ reberleri ve jurnalistleri «kendi areketlerinden mesülietni akimiyetke qaldıracaq olalar».
ATR hadimlerine tintüv sabağa qadar süre bilecegini ayttılar.
