Qırım akimiyeti bildire ki, ATR qırımtatar telekanalınıñ reberleri ve jurnalistleri «kendi areketlerinden mesülietni akimiyetke qaldıracaq olalar», – dep ayttı işğal etilgen Qırımnıñ içki siyaset, informatsiya ve alâqalar «naziri» Dmitriy Polonskiy arbiylerniñ telekompaniyada keçirgen tintüvini izaatlap.
Qırımnıñ öz başına ilân etilgen ükümetke yaqın olğan Krıminform malümatına köre, Polonskiy qayd etti ki, «qanunğa köre akimiyetniñ er bir organı kendi vazifeleri çerçivesinde areket etmeli, ve uquq qoruyıcılarnıñ belli bir areketlerni yapmaq sebebi olsa, olar bunıñnen bağlı resmiy malümatnı bermeli».
«Meni qasevetlendirgen ekinci mesele şunda ki, telekanalnıñ vekillerinden biri, baş müdir muavini olıp, buña Qırım akimiyeti teşebbüs kösterdi, dep bildirdi. Afu etiñiz, amma uquq qoruyıcılarnıñ qanun bozuluvı aqqında haberi olsa, bu bozuvlar Qırım akimiyeti tarafından yapılmaz edi», – dep qayd etti Polonskiy.
Onıñ qayd etkenine köre, Qırım akimiyeti «söz serbestligi ve kütleviy haber vastalarınıñ serbestlik inkişafınıñ tarafdarı olğanını» qayd etken edi.
«Lâkin kütleviy haber vastaları ve söz serbestliginiñ inkişafı dep, qanunsız areketler yapmamaq kerek. ATR tarafından qanundan tış bir şey yapılğan olsa, demek, cevap bermek kerek olacaq, yapılmağan olsa, demek ki, er şey de yahşı olacaq», – dedi o.
Polonskiy qayd etti ki, Qırım akimiyeti uquq qoruyıcılarnıñ qararını yerine ketirmege azır.
Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamentiniñ binası yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.
ATR qırımtatar telekanalı baş müdiriniñ informatsion siyaseti boyunca muavini Lilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.
Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi. O, işbu vaqianı qırımtatarlarnı qorqutmaq içün bir usul olaraq adladı.
Bir qaç saatten videoarhiv ile server tutıp alındı. Şimdilik efirni yalıñız telekanalnıñ saytında ve sputnik ağında seyir etmek mümkün.
ATR hadimlerine tintüv sabağa qadar süre bilecegini ayttılar.
