Link açıqlığı

Ukrainanıñ mustaqil media-zenaat birligi: ATR tintüvi – nizamsızlıq ve siyasiy cezalav


Ukrainanıñ mustaqil media-zenaat birliginde (NMPU) bazarertesi künü, yanvar 26-da, ATR birinci qırımtatar telekanalında keçirilgen tintüvden sebep çorlanalar.

Bunı Qırım.Aqiqatqa Ukrainanıñ mustaqil media-zenaat birligi başınıñ muavini Andriy Yanitskiy bildirdi.

«NMPU komiteti sabadan Qırım vaziyetini muzakere ete. Nizamsızlıq, siyasiy cezalavdır. Yarımadada şimdi de-fakto rusiyeliler yolbaşçılıq etkeni sebebinden bizim Qırım akimiyetine tesir etmek içün imkânlarımız sıñırlıdır. Biz OSCE, Juralistlerniñ halqara federatsiyasında olğan şeriklerimizni celp etecekmiz, bu meseleni Moskvada kötersinler dep, Rusiye jurnalistler birliginde zenaatdaşlarımız ile bağlanacaqmız», – dedi Yanitskiy.

Onıñ sözlerine köre, NMPU öz tarafından «işbu haberni Kiyevde tarqatmağa areket ete», – dedi o.

Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamenti divarları yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.

Hatırlatamız, 2014 senesi fevral 26 künü Qırım parlamenti divarları yanında Qırımnıñ ayırıluvına qol tutqanlar ve Ukraina birdemligi tarafdarları arasında muqavemet-mitingi keçirilgen edi. Ekinci tarafnıñ esas qısmı qırımtatarları edi.

ATR qırımtatar telekanalınıñ haber siyaseti boyunca baş müdiriniñ muavini Lilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.

Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi. O, işbu vaqianı qırımtatarlarnı qorqutmaq içün bir usul olaraq adladı.

Bir qaç saatten videoarhiv ile server tutıp alındı. Şimdilik efirni yalıñız telekanalnıñ saytında ve sputnik ağında seyir etmek mümkün.

ATR hadimlerini tintüv sabağa qadar süre bilecegi aqqında tenbiyelediler.

XS
SM
MD
LG