Link açıqlığı

İçtimaiy ağlarda qırımtatarlarnı ATR telekanalına qol tutmağa çağıralar. Qırım.Aqiqat mühbiri bildirgeni kibi, telekanal binasına gençler ve qartlar kele.

«Aqmescitliler, qırımtatarlar, acele paylaşıñız. Er kes SimSitiTrans ofisine kelsin. Hadimlerniñ ricasıdır. Olarğa yardım kerek. Yardımımız. Vaqıt kelgendir endi», – deyler içtimaiy ağlarda.

Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamenti divarları yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.

Hatırlatamız, 2014 senesi fevral 26 künü Qırım parlamenti divarları yanında Qırımnıñ ayırıluvına qol tutqanlar ve Ukraina birdemligi tarafdarları arasında muqavemet-mitingi keçirilgen edi. Ekinci tarafnıñ esas qısmı qırımtatarları edi.

ATR qırımtatar telekanalınıñ haber siyaseti boyunca baş müdiriniñ muavini Lilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.

Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi. O, işbu vaqianı qırımtatarlarnı qorqutmaq içün bir usul olaraq adladı.

Bir qaç saatten videoarhiv ile server tutıp alındı. Şimdilik efirni yalıñız telekanalnıñ saytında ve sputnik ağında seyir etmek mümkün.

ATR hadimlerini tintüv sabağa qadar süre bilecegi aqqında tenbiyelediler.

XS
SM
MD
LG