Aqmescitte belgisiz şahıslar ATR yekâne qırımtatar telekanalını sarıp aldılar.
Bunı öz Facebook saifesinde Qırımtatar halqınıñ aq-uquqlarını qorçalav komitetiniñ reisi, Meclis azası Eskender Bariyev bildirdi.
Onıñ bergen malümatına köre, telekanalda tintüv keçirile. O, teleşirketniñ paalı donatması bozula bilecegini tüşüne.
İşbu malümatnı Qırım.Aqiqatqa telekanalnıñ hadimi tasdiqladı.
«Maskalı ve silâlı insanlar teleşirketimizge sürip kirdiler. Areketleri ne sebepten ve nege bağlı olğanı şimdilik belgisizdir», – dep tarif eteler hadimler.
«ATRde «maski şou». Silâlı insanlar ile tolu «Kamaz», FHH ve Taqiqat komitetiniñ taqiqatçıları kelip çıqtı. Şimdi yolbaşçılıq ile subet keçireler. Er bir kabinetniñ yanında silâlı insan tura. İşke biraz keder etseler bile, şimdilik efir devam etmekte. Kamerağa çekmege yasaq, tehnikanı tutıp almağa vade eteler», – dep yazdı telekanalnıñ mühbiri öz Facebook saifesinde.
Üylede telekanalda acele yayın olacaqtır.
Qırım.Aqiqat mühbirleri telekanalğa yol aldı ve birazdan daa da tafsilâtlı malümatnı bermege areket eterler.
