Link açıqlığı

Bazar künü, yanvar 25-de, Qırımtatar Milliy Meclis reisiniñ muavini Ahtem Çiygoz Sudaq regionı Qoz ve Toqluq köyleriniñ sakinleri ile körüşti. Körüşüvlerde tamır halqnıñ vekilleri Qırım akimiyetiniñ faallerge nisbeten etken areketleri ve kelecek matem tedbirlerniñ keçirüv tarzı boyunca öz açuvını bildirdiler.

Bunı Qırımtatar Milliy Meclisiniñ matbuat hızmeti bildire.

Şu cümleden, körüşüvlerde qırımtatar halqınıñ aq-uquqlarınıñ bozuluvı, milliy areket faalleriniñ ve Qırımtatar Milliy Meclis azalarınıñ siyasiy taqibi ile bağlı vaziyet muzakere etildi.

«Körüşüv iştirakçileri Qırımğa qırımtatar halqınıñ yetekçileri Mustafa Cemilev ve Refat Çubarovğa kiriş yasaqlığı, ve şu künleri yüz bergen Sinaver Kadırovnıñ sürgün etilmesi boyunca öz açuvını bildirdiler. Toplanğanlar qayd etkeni kibi, resmiy akimiyet organları tarafından cemaat faalleriniñ ve siyasetçilerniñ taqip etilmesi mümkün olmağan bir şeydir», – deyler matbuat hızmetinde.

Meclisniñ haber etkenine köre, iştirakçiler akimiyet temsilcileriniñ mayıs 18 kününiñ – Qırımnıñ sürgün etilgen halqlarınıñ hatıra Künü – keçirilüv tarzınıñ deñiştirilmesi aqqında bildirüvi boyunca öz hoşnutsızlığını bildirdiler.

«Mayıs 18 künü munasebeti ile tedbirlerniñ keçirilmesini akimiyet degil de, hususan onıñ Zaur Smirnov kibi ayrı vekilleri degil, Qırımtatar Milliy Meclisi belgiley», – dep qayd etti Ahtem Çiygoz.

Bunıñ ile körüşüv iştirakçileri fevral 23 kününe planlaştırılğan Noman Çelebicihannıñ facialı ölüminiñ yıllığına bağışlanğan tedbirlerni muzakere ettiler.

Körüşüvlerniñ devamında iştirakçilerden bazıları Qırımtatar halqınıñ aq-uquqlarını qorçalav komitetiniñ qırımtatar gençleriniñ Rusiye ordusına çağırıluvına qarşı arizasına qol tuttılar.

Mecliste yarımada boyunca yaşağan qırımtatarlar ile körüşmege niyetindeler, regional meclislerniñ temsilcilerini Meclis yolbaşçılığınıñ işbu qararını amelge keçirmege çağırdılar.

Yanvar 22 künü keçirilgen matbuat konferentsiyasında Milletlerara munasebetler ve sürgün olunğan grajdanlarnıñ işleri boyunca Qırım «devlet komitetiniñ» reisi Zaur Smirnov yarımadada adet üzre mayıs 18 kününde keçirilgen Qırımnıñ sürgün etilgen halqlarınıñ hatıra Kününiñ keçirilüv tarzı 2015 senesi deñişe bilecegini qayd etti.

Haber etilgeni kibi, 2014 senesi işğal etilgen Qırım akimiyeti mayıs 18 künü munasebeti ile Lenin meydanında mitingni keçirmege izin bermedi. Miting Aqmescit rayonı Aq-meçet qasabasında keçirildi.

XS
SM
MD
LG