Link açıqlığı

Nariman Celâl: Mustafa Cemilevge Qırımğa kirişni yasaq etmek – Rusiye akimiyeti tarafından qırımtatarlarğa nisbeten etilgen bir toqattır


Qırımtatar Milliy Meclis reisiniñ muavini Nariman Celâl Mustafa Cemilevniñ vaziyeti mahkeme qararlarına bağlı olmağanından emindir. Cemilevge Qırımğa kirişi yasaq etilmesiniñ siyasiy negizi bardır. Onıñ fikrine köre, işbu yasaq yarımada tamır halqı içün ciddiy bir toqattır.

Bunı Qırımtatar Milliy Meclisniñ matbuat hızmeti bildire.

Meclisniñ reis muavini aytqanı kibi, bugün onıñ yaşdaşı olğan semetdeşleri, em de gençler içün qırımtatarlarnıñ avdeti oğrunda küreşi pek emiyetlidir, Mustafa Cemilev ise bu küreşniñ mücessemi ola

«İtibarlı insan, Sovet birligi kibi devlette dissident olğan, halqınıñ aqları oğrunda ve sovet totalitar ya da avtoritar rejimine qarşı küreşken insan nasıldır bir devlet tarafından böyle munasebetke lâyıq degildir», – dey Nariman Celâl.

Şu cümleden, o, qırımtatarlarnıñ milliy yetekçisiniñ Qırımğa kiriş yasaqlığı ile bağlı davası boyunca mahkeme toplaşuvınıñ başqa künge qaldırılmasından çorlandı.

«Öz yaşayışını bu kurşke feda etken, neticede yıllar devamında sovet lagerlerinde bulunğan insanğa Vatanına kirişini yasaq etmek – Rusiye akimiyeti tarafından qırımtatarlarğa nisbeten etilgen ciddiy bir toqattır. Şunıñ içün buña Rusiye Federatsiyasınıñ diqqatı hususiy olmalıdır ve doğru netice ve qararlar alınmaq kerektir. Mahkemede çeşit delil ketirile bile, amma bu meseleniñ yuridik, cinaiy ya da başqa bir negizi yoqtır. Mında yalıñız siyasiy bir mana bardır. Cevabı da siyasiy olmalıdır», – dep qayd ete Meclisniñ reis muavini.

Rusiye Federatsiyasında Moskvanıñ Basman mahkemesi keçirilüvi cumaaqşamı künü, yanvar 22-ne, planlaştırılğan Mustafa Cemilevniñ Rusiye Federal migratsion mahkemesine olğan davası boyunca toplaşuvnı fevral 12-ne qaldırdı, Mustafa Cemilev mahkemeden ğalip çıqacağına inanmasa da, atta böyle vaziyet oña Qırımğa qaytmağa yardımcı ola bilecegini tüşüne.

Cemilevge Rusiye tarafından işğal etilgen yarımadağa kirişni 2014 senesi mayıs ayında yasaq ettiler.

XS
SM
MD
LG