Link açıqlığı

Qırımnıñ eñ yüksek noqtasında Ukraina bayrağını tiklegen Rusiyelini «E» merkezine sorğuğa çağırdılar


Yañı yılda Roman Qoş dağında Ukraina bayrağını tiklegen Rusiyeli Aleksandr Poltavskiyni Ekstremizmge qarşı merkezge çağırdılar. Bunı o, Jivoy Jurnalda bildirdi.

«Bugün Keriçte «Ekstremizmge qarşı merkez»de Yañı yıl hayırlavım boyunca izaat bergen edim. Bugün, yanvar 23-de çağırdılar, yani seferden 3 afta keçkenden soñ! Aceba, olar aqıllarını toplap, buña diqqat etmezlermi, dep tüşüngen edim! Amma, yoq», – yazdı Poltavskiy.

Aleksandr Roman Qoşta tiklegen bayraqnı hayriye internet-mizattan satacaq edi, amma şimdi onıñ keçirilmesi havflıdır.

«Mizat ve hayriye işni keçirmege izin bermezler, ğaliba, bu aqqında bayraqnı ala bilecek insanlarnı haberdar ettim», – dedi o.

2015 Yılbaş gecesi işğal etilgen Qırımnıñ eñ yüksek noqtasında Ukraina bayrağı tiklengen edi. Onı Rusiyeli Aleksandr Poltavskiy tikledi ve bunı aks etken videonı internetke yükledi.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG