Cumaertesi künü, yanvar 24-te, saba saat 09.25 qanunsız silâlı birleşmelerniñ boyevikleri Mariupolniñ şarqiy civarına «Gradlardan» ateş açtılar. Olimpiyskaya soqağında mesken evler viran etildi, qurbanlar aqqında malümat ögrenile.
Bunı ATO matbuat merkezi bildire.
Donetsk vilâyetindeki içki işler nazirliginiñ baş idare yolbaşçısı Vâçeslav Abroskin Facebook saifesinde bildirdi ki, ateş neticesinde 10 insan elâk oldı.
«Boyeviklerniñ Mariupolge açqan ateş neticesinde, Kiyevskaya, Olimpiyskaya, 1 mayıs soqaqları rânında mesken yerde 10 insan elâk oldı. Malümat ögrenile», – dep yazdı Abroskin. Onıñ aytqanına köre, vaqia yerinde militsiya şeer bölüginiñ taqiqat-acele gruppası çalışmaqta.
Bundan evel boyevikler Debaltsevo ve Ukrainanıñ silâlı quvetleri noqtalarına ateş açmaqnen beraber şeerni ükümetniñ nezareti altında bulunğan diger yerler ile birleştirgen yolnı ateş altına aldılar.
Bir çoq adam evlerini terk etmege tırışa.
