Birleşken Milletler Teşkilâtı Rusiyeden separatistlerniñ nezareti altında bulunğan Ukraina şarqına ketirilgen «gumanitar yük» aqqında malümat bermesini talap ete, dep bildirdi cuma künü BMT. Bunı Radio Svoboda bildire.
BMT gumanitar yardım koordinatsiyasınıñ idaresi Ukraina vaziyeti aqqında esabatında hatırlattı ki, Rusiye keçken yılnıñ avgust ayından itibaren Donbassta «devletten tış küçleri» tarafından nezaret etilgen yerlerge 11 «gumanitar konvoynı» yolladı. Rusiye bildirdi ki, anda gumanitar yardımnıñ 14 500 tonnası bar edi.
Buña baqmadan bu künleri Rusiye separatistlerniñ nezareti altında olğan yerlerge 12-nci «gumanitar konvoynı» yollaycaq ola. Kiyev bunıñ qanunsızlığını sıq-sıq qayd ete.
Ukraina dey ki, Rusiye Ukraina iznini almayıp, bunıñ kibi «gumanitar konvoylarnı» kirsetilmesinen Ukraina ve halqara qanunlarını bozmaqta. Ukraina ve Qızıl Haç Halqara komiteti bu «gumanitar yardımlarnı» qabul etmekten ve ozğarmaqtan vazgeçeler, çünki Rusiye yük aqqında malümatnı bermey.
Ukraina bildire ki, bunıñ kibi «yükler» kirsetilgen soñ separatistlerniñ ücümleri quvetleşe. Bundan ğayrı, ukrain tarafı bildire ki, bu maşinalar ile Donbass zavodlarından donatmalar ve elâk olğan rusiyelilerniñ cesedleri çıqarıla edi.
Rusiye tarafı maşinalarda yalıñız kerek şeyler bar olğanını bildire. Faqat bugünge qadar Ukraina gumanitar yükni baqıp olamadı.
