Boyevikler Debaltsevo ve Ukrainanıñ silâlı quvetleri noqtalarına ateş açmaqnen beraber şeerni ükümetniñ nezareti altında bulunğan diger yerler ile birleştirgen yolnı ateş altına aldılar. Bunı UNİAN bildire.
Qayd etile ki, boyevikler rayonğa batalyon-taktik gruppasını yolladılar. Onıñ erkânında Rusiye askerleri ve yerli boyevikler bar.
«İnformatsion qarşılıq» mütehassıslarınıñ malümatına köre, batalyon-taktik gruppasınıñ 12 tankı, 25 uruş cenk maşinası ve topları mevcut.
Debaltsevoda adamlar tışarı çıqmağa qorqalar. Sakinlerniñ çoqusı çıqıp ketti. Qalğanlar ise mağazlarda saqlanalar.
Militsiyanıñ şeer bölüginde adamlar çoq. Uquq qoruyıcılar ukrain blokpostlarından keçip, ATO zonasını terk etmege yardım etken şeadetnamelerni resmiyleştireler.
Şeerde ışıq yoq – o, açılğan ateşten soñ yoq oldı.
Şeerdeki vaziyetten sebep yaqın künleri Rusiye ukrain askerlerinen beraber ateş toqtatılması rejimini nezaret etken arbiylerni tahliye etmek istey. Bunı OSCE bildirdi. Rusiyeliler Soledarda yerleşecekler.
Meraqlısı şu ki, Debaltsevoda rusiyelilernen beraber çalışqan ukrain arbiyleri bir yerge ketmeycekler.
