NATO Donbasstaki boyeviklerge berilgen Rusiye silâsınıñ artmasını bildire. Bunı alânsnıñ baş kâtibi Jens Stoltenberg cuma künü, yanvar 23-te, Kosovada Reuters intervyüsında ayttı», – dep haber ete Radio Svoboda.
«Bizler separatistlerge berilgen Rusiye ağır silâsınıñ artmasını köremiz. Tank, arbiy maşina, top ve zemaneviy raketalarğa qarşı mudafaa sistemaları aqqında aytıla», – dedi Stoltenberg.
NATO baş kâtibi qayd etti ki, alyans «NATOnıñ şarqiy qısımlarında arbiy bulunuvını arttıracaq».
Yanvar 23-te terrorizmge qarşı tedbirlerniñ matbuat kâtibi Andriy Lısenko bildirdi ki, al-azırda boyeviklerniñ nezareti altında olğan yerlerde Rusiye askerleriniñ sayısı Donbass zıddiyetiniñ başından itibaren eñ yüksek noqtasına yetti – 9000-den ziyade.
Avropada NATO silâlı quvetleri birleşmeleriniñ baş komandanı, general Filipp Bridlav cumaaqşamı künü, yanvar 22-de, «kontakt sızığı» boyu vaziyet Ukraina şarqında «yahşı degil», dep bildirdi.
Bridlav Donbassta bulunğan Rusiye askerleriniñ tam sayısını aytmasa da, NATO ava mudafaasına qarşı sistemalar ve elektron apparat sistemalarınıñ «izlerini» qayd etip başladı.
Ukraina ve Ğarp Rusiyeni Donbasstaki boyeviklerge silâ bergeninde ve Ukraina şarqına ordu kirsetkeninde qabaatladı. Moskva bu qabaatlarnı red ete.
AQŞ, Avropa birligi ve diger memleketler Qırım işğali ve Ukraina şarqındaki separatistlerge qoltutuv sebebinden Rusiyege qarşı cezalar kirsettiler. BMT malümatına köre, Donbasstaki cenk areketleri neticesinde 5000 insan elâk oldı.
