İşğal etilgen Aqyarda Federal havfsızlıq hızmetiniñ yerli idare hadimleri cuma künü, yanvar 23-te, 20-30 yaşları arasında üç qırımtatarını yaqaladılar.
Qırım.Aqiqat mühbiri bildire ki, yaqalanğanlarnı 2003 senesinden itibaren Rusiye Federatsiyasında yasaq etilgen «Hizb ut-Tahrir» teşkilâtınıñ faaliyetinde iştirak etkenlerinde qabaatlaylar.
Adliyeci Emil Kürbedinov bildirdi ki, üçüni de eki ayğa yaqaladılar.
Uquqçınıñ qayd etkenine köre, eki-üç kün devamında olarnı Qırımdaki yekâne SİZO olğan Aqmescitke alıp kete bileler.
Onıñ malümatına köre, yaqalanğanlarnı Rusiye Federatsiyası Cinaiy kodeksiniñ 205.5 maddesini («Terroristik teşkilât faaliyetini teşkil etüv ve bunıñ kibi teşkilâtlarnıñ faaliyetinde iştirak etüv») bozğanlarında şekleyler. İşbu madde boyunca 15-20 yıllıq apis cezası ya da ömür boyu apis cezası belgilene.
«Bu adamlarnıñ «Hizb ut-Tahrir» areketine alâqaları olğanlarını daa isbatlamaq kerek. Ukraina zamanında da olar Ukraina havfsızlıq hızmetiniñ nezareti altında olğan ediler, lâkin bütün 12 mahkeme toplaşuvında ğalip çıqtıq», – dep qayd etti Kürbedinov.
«Bu qırımtatarlar içün bir imtiandır. Halq şimdi o «hizb» dep aytsa, bunı er yerde yapacaqlar. Akimiyet begenmegen er bir musulmannı terrorizmde qabaatlay bileler. Bunıñ içün bu yaqalavlar – halq içün lakmus kâğıtıdır», – dep qayd etti Emil Kürbedinov.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
