Ukrainada mahkemecilerniñ qararları akimiyet tesirine köre degil, qanunğa köre çıqarılmalı, – dep ayttı «Ukrain evi» Qırımnıñ iş ve medeniyet işbirligi merkezi» cemaat teşkilâtınıñ reisi Andrey Şçekun. Böyle etip o, Bölge memuriy mahkemesiniñ Ukraina milliy bankınıñ areketleri işğal etilgen Qırımdan köçip kelmege mecbur olğan adamlarnı ayırımğa oğratqanını isbatlaycaq olğan uquq qorçalayıcılarnıñ davasını açmamaq qararını izaatladı.
«Mence, ürmetli mahkemeciler nasıl bir devlette yaşamaq keregimizni alâ daa añlamadılar. Olarnıñ qararları akimiyet tesirine bağlı olmamalı. Ukraina vatandaşı olaraq Ukraina Milliy bankınıñ qararı esas qanun – Ukraina Anayasasından – daa da müim sayılmasına razı degilim. Bu sebepten mahkemeleşecekmiz, yuqarı mahkeme organlarına, şu cümleden Avropa mahkemelerine muracaat etecekmiz. Bu bizim cemaat borcumız – qırımlılarnıñ aq-uquqlarını qorçalamaq ve «akimiyetniñ mahkemeciler ile birdemlik» sistemasını deñiştirmektir», – dep ayttı Andrey Şçekun Qırım.Aqiqatqa bergen izaatında.
Yanvar 22-de Kiyevniñ Bölge memuriy mahkemesi Ukraina milliy bankınıñ №699 qararı işğal etilgen Qırımdan köçip kelgen adamlarnı ayırım yapqanını isbatlaycaq olğan uquq qorçalayıcılarnıñ davasını açmağa razı olmadı.
İnsan aqları boyunca Regional merkeziniñ eksperti, adliyeci Sergey Zayets bildirdi ki, ileride mahkeme qararına apellâtsiya şeklinde itiraz bildirilecek. Uquq qorçalayıcılar qırımlılarnıñ menfaatlarını qorçalamaq içün İnsan aqları Avropa mahkemesine de muracaat etmege azırlar.
Uquq qorçalayıcılar Ukraina Milliy bankınıñ №699 qararı yarımadanı terk etken ve qıtaiy Ukrainada yaşağan qırımlılarnı ayırım yapa, dep bildirgen ediler.
