Ukraina şarqında keçken seneniñ aprel ayından itibaren cenk uruşları neticesinde 5086 insan elâk oldı. Bunı cuma künü, yanvar 23-te, Birleşken Milletler Teşkilâtınıñ insan aqları boyunca hızmetlerniñ vekili Rupert Colville aytıp, zıddiyet qurbanlarınıñ sayısı daa ziyade olması mümkün, dep qayd etti, – haber ete Radio Svoboda.
Onıñ aytqanına köre, yanvar 13-ten itibaren 262 insan elâk oldı. Onıñ qayd etkenine köre, soñki doquz kün «keçken seneniñ sentâbr 5-te Donbassta başlanğan ateş toqtatılması rejiminiñ eñ qıyın zamanı oldı».
Colvilleniñ bildirgenine köre, aprel ayından itibaren Ukraina şarqında 10948 insan yaralandı.
Rupert Colville dedi ki, BMT-ni Ukrainanıñ şarqiy vilâyetlerinde çetel arbiylerniñ bulunması, ve olarnıñ arasında Rusiye askerleri, em de silâlı birleşmelerniñ nezareti altında olğan mesken yerlerde ağır silâ olması qasevetlendire.
BMT qaçaqlar işleri hızmeti bildirdi ki, Ukraina ükümeti qabul etken havfsızlıq tedbirleri «zıddiyet alanına gumanitar yardım ketirilmesine» keder ete ve cenk uruşlarından sebep evlerini terk etmege mecbur olğan şahıslar içün qoşma qıyınlıqlar doğura.
