Yanvar 23-ne keçer gecesi yarımada çıqışında Rusiye sıñır bekçileri tarafından yaqalanğan qırımtatar uquq qoruyıcıları ve Meclis azalarını Rusiye Federatsiyasında bulunuv tarzınıñ bozuluvında qabaatlaylar.
Bunı Qırım.Aqiqat saytına Meclis azası, Qırımtatar halqınıñ aq-uquqlarını qorçalav komitetiniñ reisi Eskender Bariyevniñ qadını Zarema bildirip, onıñ ömür arqadaşı diger yaqalanğanlar ile Ermeni Bazarnıñ kiriş noqtasından keçmege areket etkenini tasdiqladı.
Onıñ haber etkeni kibi, Rusiye mahsus hızmetleriniñ hadimleri yaqalanğanlarnı birer-birer çağırıp, olar, çetel vatandaşları olıp, Rusiye Federatsiyasınıñ toprağı olğan Qırımda bulunuv tarzını bozğanı aqqında haber eteler. Meclis temsilcileri ve uquq qoruyıcılarğa olarnıñ Qırımda bulunuvı 90 künden ziyade olmamaq kerekligini bildirdiler.
«Birer-birer subetke çağıralar ve, açıqtan bir şey añlatmayıp, nasıldır bir protokollarnı tizeler», – dedi Zarema Bariyeva ve yaqalanğanlar Qırım qaydı ile Ukraina vatandaşları olğanını qayd etti.
O şunı da bildirdi ki, Sinaver Kadırov yürek ameliyatını yapmaq içün çıqacaq edi.
Qırım.Aqiqat yaqalanğanlar ile bağ qurmağa areket ete, amma telefonları cevap bermey. Tuvğanlarınıñ fikrine köre, Rusiye sıñırcıları telefonlarını tutıp ala bile edi.
Rusiye qanunlarına köre, Rusiye Federatsiyasında çetel vatandaşlarınıñ ya da vatandaşlığı olmağan şahıslarnıñ bulunuv tarzınıñ bozuluvı «memuriy para cezasınıñ berilmesi ile Rusiye sıñırlarından sürgün etilmesini nazarda tuta».
Cuma künü, yanvar 23-de, gece maalde, Qırımtatar halqınıñ aq-uqularını qorçalav komitetiniñ koordinatorları Eskender Bariyev, Abmecit Suleymanov (ekisi de Meclis azası ola) ve Sinaver Kadırov Çonğar «Rusiye sıñırında» uquq qoruyıcı organlarınıñ hadimleri tarafından yaqalandılar.
Olarnı bir vagonğa qapattılar, sıñır nezaret vekilleri ile qavğa yüz berdi, bundan soñ olarğa maşinağa qaytmağa musaade ettiler, faqıt maşina anahtarını tutıp aldılar. Uzun vaqıt devamına qırımtatar faalleri maşinada oturıp, iza subetini keçirecek uquq qoruyıcı organlarınıñ hadimini bekley ediler.
