Saudiy Arabistan qıralı Abdullah ibn Abdul-Aziz Al Saud 91 yaşında vefat etti.
Bunı cuma künü saba erte Saudiy Arabistannıñ devlet televideniyesi bildirdi.
Beyanatta aytılğanı kibi, qıral saat birde, yerli vaqıt boyunca, cuma künü vefat etti. Ölüm sebebi şimdilik belgisizdir, amma belli ki, keçken seneniñ soñunda qıral aqciger yuquncı ile memleket paytahtı Er-Riyade hastahanesine yatqızğan edi.
Bildirile ki, Saudiy Arabistan tahtına, beklenilgeni kibi, 76 yaşında şahzade Salman ibn Abdel Aziz Al Saud keçti.
AQŞ devleti kâtibi John Kerry Amerika Qoşma Ştatları dostu, ekstremizm ile küreşinde cesür şerigi, Yaqın Şarqta barışıq ketişatnıñ nufuzlı tarafdarnı ğayıp etkeni aqqında bildirdi.
Qıral Abdullah tahtqa 2006 senesi keçti, amma amelde Saudiy Arabistanda keçken asırnıñ 90-ncı senelerinden yolbaşçılıq ete edi, çünki onıñ selefi qıral Fadhnıñ ağır hastalığı bar edi.
Abullah orta islâatlarnıñ tarafdarı edi, şu cümleden qadın aqlarınıñ keñişletüvi ve iqtisadiyat saasında devlet idaresiniñ azlaştıruvı, faqat, onıñ saltanatı vaqtında körümli demokratik çevirmeler yoq edi.
Tış siyasette o er vaqıt İranğa nisbeten ciddiy yanaşa ve ğarbiy memleketler ile güzel munasebetlerni qurmağa tırışa edi. Qıral Abdullah memleketi içün adetiy olğan AQŞ ile yaqın munasebetlerni saqlamağa areket ete edi. Analitiklerniñ fikrine köre, yañı qıral kelse de, Saudiy Arabistannıñ tış ve içki siyasetinde körümli deñişmeler olmaz eken.
