Yarımadada adet üzre mayıs 18 kününde keçirilgen Qırımnıñ sürgün etilgen halqlarınıñ hatıra Kününiñ keçirilüv tarzı 2015 senesi deñişe bile. Bunı cumaaqşamı künü, yanvar 22-de, Milletlerara munasebetler ve sürgün olunğan grajdanlarnıñ işleri boyunca Qırım «devlet komitetiniñ» reisi Zaur Smirnov bildirdi, – haber ete Qırım.Aqiqat.
Jurnalistniñ bu sene mayıs 18 künü adetiy miting olacaqmı degen sualine cevap berip, Smirnov bu kün «siyasiy tesir aleti olğanı» aqqında bildirdi.
«Minberde er yıl aynı rezolütsiyalar ile aynı insanlar buluna edi. Şunıñ içün, menimce, işbu matem tedbirniñ keçirilüv tarzını deñiştirmek kerektir, bundan manası deñişmez de», – dep bildirdi Milletlerara munasebetler ve sürgün olunğan grajdanlarnıñ işleri boyunca Qırım «devlet komitetiniñ» reisi Zaur Smirnov.
«Akimiyet, qırımtatarlarnı ealige qarşı qoymaq içün, bu yürüşten faydalana edi ve işbu emirler Kiyevden Aqmescitke kelip çıqa edi. Şu vaqıtları insanlar mayıs 18 künü soqaqalrğa bile çıqmağa qorqa edi. Ortalıqta er şey qapala ve militsiyağa tola. Bundan çetleşmek vaqıt keldi», – dedi Smirnov.
Onıñ sözlerine köre, akimiyet şimdi «mayıs 18 künü nasıl şekilde keçecegini» tüşüne.
«Evelden bizge bunı yükley ediler. Bir şey soramayıp, mayıs 18 künü – er kes meydanğa, – dep, er kes kete edi. Belki, bu sene de öyle yaparmız. Amma men tedbirniñ mündericesini deñiştirmek kerek, dep aytam», – qayd etti o.
Haber etilgeni kibi, 2014 senesi işğal etilgen Qırım akimiyeti mayıs 18 künü munasebeti ile Lenin meydanında mitingni keçirmege izin bermedi. Miting Aqmescit rayonı Aq-meçet qasabasında keçirildi.
