Kiyevniñ Solomensk rayon devlet memuriyetinde yanvar 22 künü Ukraina Birdemlik Kününe bağışlanğan tantanalı tedbirler keçirildi. Qırım.Aqiqat mühbiri aytqanı kibi, tedbirge işğal etilgen Qırımdan mecburen köçip kelgenler davetli edi.
Rayon devlet memuriyeti divarları ögünde tedbir bayraqnıñ köterilmesi ve bugünge qadar ve bugün yekâne, mustaqil Ukraina içün canını bergen vatandaşlarnıñ hatırasına sükünet daqqasından başlandı. Selâmlaşuv sözleri ile Solomensk rayon devlet memuriyetiniñ reis muavini Vladimir Bâlkovskiy ve Ukraina içki işler milliy akademiyasınıñ rektor muavini Valeriy Sokurenko çıqışta bulundılar.
Qırımdan mecburen köçip kelgenlerniñ adından kiyevliler ögünde «Ukrain evi» iş ve medeniy emekdaşlıq Qırım merkezi» cemaat teşkilâtınıñ reisi Andriy Şçekun çıqışta bulundı. O, qırımlılarnıñ mustaqil Ukraina ile birlikte olmağa ıntıluvı aqqında bildirdi.
«Öyle oldı ki, toprağımızğa duşman keldi, onıñ bir qısmını işğal etti, amma biz bir daqiqa, bir saniyege bile Qırımnıñ azat olacağına ümüdimizni coymaymız. Çünki bunı yarımadada yaşağan qırımlılar sabırsızlıqnen bekley, biz bunı unutmamaq kerekmiz. Borcumız – toprağımızdan duşmannı birlikte quvıp çıqarmaqtır», – qayd etti Andriy Şçekun.
Çıqışnıñ soñunda o, rayon devlet memuriyetiniñ yolbaşçılığına, kiyevlilerge, ukrainlilerge qırımlılarğa qol tutqanları içün minnetdarlığını bildirdi.
Aqmescitten köçip kelgen Andriy Çebotaröv aytqanı kibi, Solomensk rayon develt memuriyeti – qırımlılarğa yardım etken birinci devlet strukturasıdır.
«Biz Mecburen köçip kelgenlerniñ Bütünukrain qurultayına ve «tögerek masa» toplaşuvına azırlanıp oldıq. Bundan da ğayrı, memuriyet tarafından haber berüv destegi de kösterile edi. Şu cumlden, Kiyevniñ farqlı devlet müessiselerine tevsiye mektüpleri yollanıla edi, bunıñ sayesinde qırımlılarnıñ cemaat faaliyetine imkânlar yaratıla edi», – tarif etti Çebotaröv.
Tedbirniñ devamında: «Ukraina Birdemlik Künü: tarih ve zemane» mevzusında lektsiya-muzakere keçirildi.
