İşğal etilgen Qırımnıñ şifahanelerinde 2014 senesi okâtbr ayından bedava yollanmalar boyunca Rusiye Sverdlovsk vilâyetinden kelgen 5 695 insan, şu cümleden tahminen 600 bala raatlandı. Bu kibi malümatnı Rusiye içtimaiy sigorta fondunıñ regional bölügi reisi Roza Zelenetskaya bildirdi, – haber ete TASS.
«Birinci sefer oktâbr 24 künü keçirildi, soñkisi dekabrniñ 31-de. Qısqa müddet devamında o qadar insan daa kelmegen edi», – dedi o.
Neşirniñ malümatına köre, 2014 senesi Qırım şifahanelerinde region sakinleriniñ qış tatillerini teşkil etmek içün federal bücetten 218 million ruble ayırılğan edi.
«Yardımnı yerli akimiyet ve insanlarnı Koltsovo ava limanına alıp ketirmek içün avtobuslarnı bergen şirketler köstere edi, biñge yaqın göñülli qoşulğan edi», – denile beyanatta.
«Ava limanında gruppalarnı qabul etüv tertibi, qayd etüv tikmesi ve yerleştirüv odası teşkil etilgen edi», – dep qoştı «Yedinaya Rossiya» firqasınıñ regional bölüginiñ kâtibi Viktor Şeptiy.
2014 senesi işğal etilgen Qırımda imtiyazlı yollanmalar boyunca Sverdlovsk vilâyetiniñ 12 biñ sakini raatlandı, – dep yaza neşir.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
