Link açıqlığı

Qırım «Devlet şurası» binasınıñ ögüne «parlament»niñ ukrain tilinde yazılğan serlevasını qoşalar


İşğal etilgen Aqmescitte cumaaqşamı, yanvar 22 künü, Qırım «Devlet şurası» binasınıñ ögüne «parlament»niñ ukrain tilinde yazılğan serlevasını qoşalar.

Qırım.Aqiqat mühbiri aytqanı kibi, bu haber «Devlet şurası» binası ögünde Qırım neşirleriniñ mühbirlerini topladı.

İşçiler bina ögüne öz başına ilân etilgen Qırım parlamentiniñ ögüne ukrain serlevasını yerleştireler: «Derjavna Rada Respublikı Krım» («Qırım Cumhuriyetiniñ Devlet Şurası»). Bu adise kelip-keçkenlerniñ diqqatını celp etti.

Belli olğanı kibi, Qırımnıñ işğalinden evel bu binada Qırım Muhtar Cumhuriyetiniñ Yuqarı Şurası yerleşe edi. Binanıñ ög tarafında ukrain, rus ve qırımtatarca yazılğan serlevalar asıla edi.

2014 senesi mart 17 künü Qırım Yuqarı Şurasınıñ adını «Devlet şurası»na deñiştirdiler. Amma binada olğan Ukraina tuğrası bundan evel tüşürilgen edi. Bundan soñ binanıñ ög tarafından üç tilde yazılğan serlevanı alıp, rusça «Devlet şurası» degen yazını astılar.

Aynı zamanda, 2014 senesi aprel 11 künü qabul etilgen «anayasa»ğa köre, Rusiye tarafından işğal etilgen Qırımda ukrain, qırımtatar ve rus tilleri devlet tiller olıp sayıla.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG