Bir sıra qırımtatar faali Qırımtatar Milliy Meclis reisi Refat Çubarovnıñ yanvar 17-de Qırımtatar halqınıñ aq-uquqlarını qorçalav komitetiniñ konferentsiyasını «tituşka» ve «sportçular» bozdı degen laflarını tenqit etti.
Bunı konferentsiyada ses-şamata çıqarğanlar arasında olğan Eyvaz Ümerov, Abdurrahman Saliyev, Ridvan Cabbarov ve Remzi Çaruhov yanvar 22-de Aqmescitteki matbuat konferentsiyasında bildirdiler, dep haber ete Qırım.Aqiqat mühbiri.
«Onıñ bizge olğan şahsiy munasebeti canımnı ağırttı. O, bizge «aşaa», «tituşka» ve «sportçu» dep ayttı», – dedi Eyvaz Ümerov. Kendisi de Meclis reisini bayağı aqaretledi.
«Refat ağa, kimsiñiz? Ant sözlerini bozğan, qırımtatar halqı ve Meclisniñ reisi olğan adammı?! Bu sual şübe doğura», – dedi o.
Ümerovnıñ bildirgenine köre, Çubarov «Bağçasarayda ant etip, Quran-ı Kerim ve bayraqnı öpti, halq ile olacaq, dep ant etken edi». Onıñ fikirince, Meclis reisi Qırımnıñ yañı şaraitlerinde dialog qurmaqnıñ yollarını qıdırmadı.
«O, mından qaçıp, halqını qaldırdı. Ve mından uzaq bir yerde bulunıp, üç yuzlik halqnıñ fikirini ifadeleycek ola», – dep ayttı Eyvaz Ümerov.
Jurnalistlerniñ Meclis reisiniñ Qırımğa kiriş yasağı bar degen laflarına faal «Çubarov Kiyevde qayd etilgen ve bu sebepten kirişi yasaq etilgen», dep ayttı.
«O, akimiyet ile dialog qurmağa ve yaşav yerini deñiştirmege istese edi, bunı yapmaq zor olmaz edi», – dep tüşüne Ümerov.
Bundan ğayrı, o, diger faaller ile beraber Qırımtatar halqınıñ aq-uquqlarını qorçalav komiteti teşkil etken bütün tedbirlerge kelmek niyetinde olğanını bildirdi.
«Halq nezareti olğanımıznı Bariyev (Komitet reisi – muar.) ve digerler bilmesini ister edim. Yahşı etip azırlansınlar. O, qabul etken rezolütsiya talaplarınıñ sebeplerini añlatıp olamasa, bizler yañı usullarnı qullanacaqmız», – dep ayttı Eyvaz Ümerov.
Qırımtatar Milliy Meclis reisi Refat Çubarov yanvar 17-de Aqmescitte Qırımtatar halqınıñ aq-uquqlarını qorçalav komitetiniñ bütünqırım konferentsiyasını bozacaq olğan adamlarnıñ şahsiyetlerini acele sürette belgilemege çağırdı. Aman-aman otuz insan «provokatorlar» qıçırıp, iştirakçiler qayd etilgen binağa kirmege istediler. Olardan bazılarına konferentsiyada iştirak etmege izin berildi. Qırımtatar Milliy Meclis vekilleri politsiya hadimlerini çağırdılar.
Birazdan sport qıyafetlerinde olğan adamlar salonğa kirip, konferentsiya teşkilâtçılarına ücüm ettiler.
