Lvovda yanvar 25-te «Picasso» gece klubında «ŞçedreEtno 2015» hayriye aqşamı keçirilecek. Tedbir maqsadı – işğal etilgen Qırımda qalğan ukrain cemaat faalleri içün oquv lagerniñ teşkil etilmesine para toplamaqtır.
Bunı hayriye aqşamnıñ teşkilâtçıları Qırım.Aqiqat saytına bildirdiler.
Aqşam «Patritsiya», «Joryj Kłoc» ve «Giç Orkestr», em de qırımtatar yırcısı Esken Zov ve yırcı Briya Blessing çıqışta bulunacaqlar.
«Bu sene yañı maqsat qoydıq. Qırım işğalinden sebep artıq anda başqa qanunlar olğanını bilemiz. Bu yalıñız yarımada sakinleriniñ turmuşını deñiştirmedi, cemaat faalleriniñ ayatı zor oldı. Hayriye fond ve halqara teşkilâtlar Qırımda çalışmay, qanunlar cemaat liderleriniñ imkânlarını yoq ete. Olarnıñ maqsadı ve istekleri yoq. Aynı bu sebepten «ŞçedreEtno» aqşamında bizler olarğa yardım etecekmiz», – dep ayttı hayriye aqşamnıñ teşkilâtçılarından biri Vladimir Beglov.
Onıñ aytqanına köre, Qırımdaki ukrain faallerine olarnı unutmağanlarını ve yardım etmege istegenlerini isbatlaycaq olalar.
«Qırımda eñ tez darılğan insanlar – Ukrainağa qoltutqan faaller, çünki olar ayatları ve sağlıqlarına olğan telükege baqmadan, Ukraina ile bağlarnı saqlap qalalar ve inkişaf ettireler. Olar doğru malümatnı tarqata, insan aqlarını qoruy, farqlı aktsiya ve medeniy tedbirlerni keçireler. Maalesef, olar özüni yarımadada unutılğan kibi is eteler. Bu sene ise «ŞçedreEtno» aynı bu adamlarğa ilham berecek, olarnıñ Qırımdaki ğayet qıyın missiyasını devam etmege yardım etecek ilk leyhadır», – dep ayttı «Krım SOS» teşebbüsiniñ tesisçilerinden biri Alim Aliyev.
Tedbir yerli saatke köre 19:30 başlanacaq. Bilet fiyatı – 100 grn. Biletlerni Lvovdaki «Naş Format» tükânı (Brativ Rogatıntsiv soq., 24), «Dzıga» galereyasında (Virmenska soq., 35), Svoboda caddesinde Eski Arslan Evinde ve «Picasso» klubında (kontsert künü) satın almaq mümkün.
