Link açıqlığı

Aqmescit akimiyeti 2014 senesi mart 16-da olıp keçken «referendum» yıllığına şeer merkeziniñ Nazirler şurasınıñ binası yanındaki meydannıñ körünişini deñiştirecek ola.

Bunı yanvar 22-de Aqmescit memuriyetiniñ yolbaşçısı Gennadiy Baharev jurnalistlerge bildirdi, dep haber ete Qırım.Aqiqat mühbiri.

«Ava keder etmese, bizler «Qırım baariniñ» yıllığına onıñ (Lenin meydanınıñ – muar.) körünişini deñiştirmege planlaştıramız. Bu global bir iştir, çünki vaqıt az qaldı. Adamlar azırlar, bugün men olarnen körüşem, olar leyhalarnı köstereler», – dedi o.

Baharevniñ qayd etkenine köre, meydannıñ rekonstruktsiyası yatırımcılarnıñ parasına yapılacaq. Onıñ aytqanına köre, Lenin eykeli qalacaq, çeşme qoyulmaycaq, meydannıñ örtüsi deñiştirilecek, ışıqlar qoyulacaq ve esli başlı adamlar içün raatlıq zonası olacaq.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG