Qırım ile yolcu alâqalarınıñ toqtatılması Ukraina qanunını boza, dep bildireler «İnsan aqları boyunca Qırım alan missiyasınıñ» uquq qorçalayıcı teşkilâtında.
Uquq qorçalayıcılarnıñ fikirince, Qırımda avtobus ve demir yol taşımalarınıñ lâğu etilmesi Ukraina anayasasına zıt kelip, insan ve vatandaşlarnıñ aqlarını boza.
Teşkilât «Ukrainanıñ vaqtınca işğal etilgen toprağında vatandaşlarnıñ aq-uquqları ve serbestligini ve uquq rejimini temin etüv aqqında» Ukraina Qanunınıñ 5-inci maddesine esaslana. Vesiqada aytıla ki, «Ukraina vaqtınca işğal etilgen yerlerde bulunğan Ukraina vatandaşları ile iqtisadiy, maliye, siyasiy, içtimaiy, informatsion, medeniy ve diger bağlarnı üzmemege ve temin etmege vade ete».
«Yılbaş bayramları arfesinde ilânsız qabul etilgen qarar adamlarnı zor alda qaldırdı. Adamlar Qırımdaki eki sıñırdan cayav keçmege mecbur qaldılar. Bu yol 4-5 km teşkil ete. O künleri ava sıfırdan aşağı 15 dereceni teşkil etken edi», – aytıla teşkilâtnıñ dekabr esabatında.
Mında qayd etile ki, birinci künleri yolcular içün çare tapılmadı, yalıñız şahsiy maşina ya da qanunsız alda çalışqan taşıyıcılar ile sıñırdan keçmek mümkün edi.
«Bu adım Qırım ve Herson vilâyetinde bir çoq kilometrli tıqanıqlıqlarğa yol berip, qazaiy vaziyetiniñ sebebi oldı. Adamlar Qırımda biletlerni keri teslim etip olamay ediler, ileride de tazminat ödemesi qıyınlaştırıla. Adamlar Qırımdan çıqmaq ya da kirmek içün daa ziyade para masraf ettiler», – aytıla beyanatta.
2014 senesi dekabr 24-ten itibaren Ukraina yolcularnıñ havfsızlığını tüşünip, Rusiye tarafından işğal etilgen Qırım ile avtobus ve demir yol alâqalarını toqtattı.
