Link açıqlığı

Meclis reisiniñ mesleatçısı mahkemede Qırımğa kiriş yasağına itiraz bildire


Qırımtatar Milliy Meclisiniñ reis mesleatçısı, faal İsmet Yüksel Rusiye tarafından işğal etilgen Qırımğa kiriş yasağına itiraz bildirmek içün mahkemede dava açtı, dep haber ete QHA.

Ariza em Aqmescit, em de Moskvada berildi. Moskvanıñ Meşçanskiy rayon mahkemesinde İsmet Yükselniñ arizası ilk defa yanvar 22-de baqılmalı.

Aqmescitte Kiyev rayonınıñ mahkemesi vesiqalarnı baqmayıp qaytardı. Lâkin adliyeciler tekrar baqılmasını talap etecek olalar.

«Qırımğa kirişim avgust ayında yasaq etilgenine baqmadan, em Federal havfsızlıq hızmeti, em de Rusiyeniñ Federal migratsion hızmetinden vatanım Qırımğa kirişni yasaqlağan vesiqa alâ daa maña berilmedi. Asılında bu vesiqa 2014 senesi avgust 10-de Ermeni Bazarda Qırımğa kirişim yasaq etilgen künü berilmeli edi. Bir sıra muracaatlarımız olsa da, iç bir teşkilât kiriş ne sebepten yasaq etilgenini añlatmadı, demek ki, qarar sebeplerini biz bilmeyik», – dep ayttı neşirge İsmet Yüksel.

Moskvada onıñ menfaatlarını uquq qorçalayıcı, adliyeci İllarion Vasilyev, Qırımda ise adliyeci Emil Kürbedinov temsil etecekler.

2014 senesi avgust 10-da İsmet Yükselge Qırım yarımadasına kirgende Ermeni Bazar sıñır noqtasında Rusiye Federal havfsızlığı tarafından 5 yıl devamında, 2019 senesi iyün 30 kününe qadar, Qırımğa kirişi yasaq etildi.

Aynı böyle yasaqlar altında qırımtatar halqınıñ lideri Mustafa Cemilev ve Qırımtatar Milliy Meclis reisi Refat Çubarov qaldılar. Yanvar 22-de Moskvanıñ Basman mahkemesi qırımtatarlarnıñ milliy lideri Mustafa Cemilevniñ Federal migratsion hızmetine açqan dava boyunca ilk toplaşuvnı keçirecek. Cemilev de Qırımğa kiriş yasağına itiraz bildire.

XS
SM
MD
LG