Ukraina prezidenti Petro Poroşenko Türkiye Cumhuriyetiniñ baş naziri Ahmet Davutoğlu ile körüşip, işğal etilgen yarımadada qırımtatar halqınıñ al-vaziyetini muzakere etti.
Bunı Ukraina devlet yolbaşçısınıñ matbuat hızmeti bildire.
Poroşenko qırımtatar halqınıñ aqlarına riayet etilmesi vaziyeti içün qasevetlengenini qayd etti.
«Bugünki künde qırımtatarlar büyük basqı altında bulunıp, yardımğa muhtaclar», – dedi o.
Ahmet Davutoğlu dedi ki, Qırım meselesi er daim kün tertibinde olmalı. O, Türkiye Qırım işğalini tanımaycağını qayd etti.
«Ukrainanıñ topraq bütünligi ve mustaqilligi yalıñız sizler içün degil, bütün dünya içün müimdir», – dep ayttı Davutoğlu.
Matbuat hızmetiniñ malümatına köre, eki tarafl işbirlik de muzakere etildi, şu cümleden arbiy-tehnik ve energetik saalarında.
Türkiye baş naziri Ukrainağa onıñ memleketi iqtisadiyatnıñ 25 saasında keçirgen islâatlar tecribesinden faydalanmağa teklif etti.
Ukrainağa Halqapa para fondu ve Türkiyeniñ Ukraina iqtisadiyatına yatırımları çerçivesinde maddiy yardım kösterilmesi de baqıldı. Petro Poroşenko ve Ahmet Davutoğlu eki memleketniñ maliye ve energetika nazirleri yaqın vaqıtta körüşecekler, dep añlaştılar.
Yanvar 17-de Aqmescitte Qırımtatar halqınıñ aq-uquqlarını qorçalav komitetiniñ bütünqırım konferentsiyasınıñ iştirakçileri ukrain parlamentine muracaatta bulunıp, Ukraina tışqı işler nazirligine 2015 senesi aprel ayında Birleşken Milletler Teşkilâtınıñ imayesi altında qırımtatar halqınıñ havfsızlığı halqara konferentsiyasınıñ keçirilmesine teşebbüs köstermege rica ete. Konferentsiyada Türkiye prezidenti Recep Tayip Erdoğan ve BMT Baş kâtibi Pan Gi Munğa muracaatları qabul etildi.
Bundan evel Türkiye tış işler naziri Mevlüt Çavuşoğlu Rusiye Türkiyege qırımtatarlar ile bağlı vadelerni yerine ketirmegenini ayttı. Qırım akimiyeti ise qırımtatarlarğa basqı yapılğanını red ete.
