Kiyev – Yanvar 20-de Ukrainadaki Rusiye Federatsiyasınıñ Elçihanesi yanında 40 nefer qırımlı toplaşıp, aktsiyanı keçirdi. Olarnıñ qollarında «Qırım – Ukraina!» ve «Putin, Ukrainadan ket!» levhaları bar edi, mecburen köçip kelgenler Qırım Muhtar Cumhuriyeti Kününde em Rusiye, em de Ukraina akimiyetlerine Qırım Ukrainanıñ ayırılmaz parçası olğanını hatırlatmaq istediler.
«Men Rusiye Federatsiyasınıñ Elçihanesine endi yapılğan cinayetler aqqında hatırlatmağa isteyim. Qırım işğali – halqara qanun ve bir sıra imzalanğan añlaşmalarnı bozğan halqara cinayettir. Şu cümleden özek silânıñ tarqatılmaması, em de Rusiye ve Ukraina arasında dostluq ve işbirlik añlaşmaları», – dep qayd etti «Almenda» vatandaş maarifi merkezi» cemaat teşkilâtınıñ reberi Olga Skripnik. Onıñ aytqanına köre, Qırım işğaline diqqat ayırmalı, çünki aynı ondan soñ memleket şarqındaki vaqialar yüz berdi.
Qırımlılar küçük vatan mustaqil Ukraina terkibine qaytacağında emin olğanını qayd etip, yarımadanı mecburen terk etkenler ise evlerine qaytacaqlarını bildirdiler. «Qırımnı azat etüv meselesi – zaman meselesidir. İqtisadiy basqı, diplomatik muzakereler, halqara toplulıqnıñ qoltutuvı ile – bizler Ukraina sıñırlarını ğayrıdan tikleycekmiz», – dep ayttı «Qırımnıñ ukrain cemiyeti» cemaat teşkilâtınıñ reberi Vladislav Hmelovskiy.
Çıqışta bulunğanlar Qırım mevzusı memleketniñ informatsion alanında siyrek olğanını keder ile bildirip, Ukraina akimiyeti ise susıp oturğanını ayttılar. «Yarım yıl evelsi Ukraina Nazirler şurasınıñ Qırım Muhtar Cumhuriyeti ve Aqyar şeeriniñ meseleleri boyunca Hızmetniñ meydanğa ketirilmesi aqqında qararı peyda oldı – kâğıtlardan başqa bir şey yapılmadı», – dep qayd etti «Ukrain evi» iş ve medeniyet işbirligi Qırım merkezi» cemaat teşkilâtınıñ reberi Andrey Şçekun.
Tedbir iştirakçileri yarımadada qalğan ve Ukrainağa qoltutqan qırımlılarğa destek köstermege qarar aldılar.
«Olarğa Rusiye informatsion basqısı altında yaşamaq ne qadar qıyın olğanını añlaymız, Ukrainanı sevseñ, soy, dost, qomşu saña duşmanğa kibi baqa. Şimdi Qırımda ukrain olıp qalmaq pek qıyındır», – dep qayd etti «Qırımdan mecburen köçip kelgenlerniñ teşkilâtları koordinatsion şurasınıñ» idare reisi Sergey Mokrenük.
Aktsiyada rus halqına muracaat qabul etildi. Aktsiya teşkilâtçıları qayd eteler ki, olarnıñ maqsadı rus halqına vaziyetni añlatmaq, olarnı başını köterip, kendi halqına hainlik yapqan diktatordan qurtulmaq ve Rusiyede azatlıq ve aq-uquqları içün küreşmege çağırmaqtır. Rusiyeliler, ukrainliler kibi, barışıq ve balalar içün bahtlı kelecek olmasını isteyler. Bunıñ içün Rusiye askerleri Ukraina topraqlarını terk etmeli, – dep ayttılar aktsiya iştirakçileri.
«Mart 16-da Qırımda olıp keçken «referendum» qanunğa riayet etmey, bunıñ içün Qırım Muhtar Cumhuriyeti ve Aqyar şeeriniñ statusını deñiştirmek içün iç bir sebep yoq. «Referendum» Ukraina Anayasasına uymayıp, topraq bütünligi ve halqara uquq subyektleriniñ mustaqilligi aqqında bazı halqara printsiplerni bozdı. «Referendumnıñ» qanunsızlığını 2014 senesi mart 24-ke ait Birleşken Milletler Teşkilâtı Baş Assambleyasınıñ Ukrainanıñ topraq bütünligi aqqında rezolütsiyası ve 2014 senesi mart 21-ge ait Venetsiya komissiyasınıñ qararı tasdıqlay. Qırımnıñ yalıñız bir resmiy statusı bar – Ukraina terkibinde Qırım Muhtar Cumhuriyeti ve Aqyar şeeri», – aytıla qırımlılarnıñ muracaatında.
Aktsiya soñunda Kiyev aliy oquv yurtlarına keçmege mecbur qalğan sabıq Qırım studentleri fleşmobnı teşkil ettiler. Rusiye elçihanesi tarafına gençler kâğıttan yapılğan uçaqlarnı uçurdılar. Olarnıñ qanatlarında «Qırım – Ukraina», em de PTN PNH yazıları bar edi. Qırımlılar aktsiya soñunda Ukraina gimnini icra etip, «Qırım – Ukraina!» ve «Yaşasın Ukraina» şiarlarını seslendirdiler.
