Link açıqlığı

Qırım akimiyeti nefaqa ve para yardım borclarını bermege vade ete


Qırımnıñ öz başına ilân etilgen baş naziri Sergey Aksönov yarımadada nefaqa ve para yardımınıñ berilmesi ile bağlı meseleni yanvar 23-ke qadar al etmege avale etti. Bunı o Qırım «Nazirler şurasınıñ» toplaşuvında çarşenbe künü, yanvar 21-de, bildirdi.

Qırım ükümetiniñ matbuat hızmeti bildire ki, Aksönovnıñ bu avalesini Qırım emek ve içtimaiy qoruv «nazirligi», Hazine idaresi ve Nefaqa fondu aldı.

«Müessise hadimlerine vazife: bugün «soñuna qadar» çalışmaq. Mesele çezilmese, men işte sabağa qadar oturam. Yardım kerek olsa, men federal nazirlernen bağlanırım. Cuma kününe qadar mesele al etilmeli, para berilmeli», – dedi Sergey Aksönov.

Onıñ qayd etkenine köre, qarardan ziyade çalışqan hadimlerni para mukâfatı bekley.

Malüm ki, işğal etilgen Qırımda yalıñız nefaqa ve para yardımı degil, aylıqlar da berilmey.

Yanvar 21-de Qırım maliye «naziri» Vladimir Levandovskiy bildirdi ki, Qırımda aylıqlar berilmegeniniñ sebebi Qırımnıñ bücet sistemasınıñ Rusiye standartlarına keçüvi ile bağlı.

Aqımdaki seneniñ yanvar ayınıñ soñuna qadar Qırımdaki bücet teşkilâtlarınıñ hadimleri aylıqlarını tolusınen alacaqlar, – dedi o.

2014 senesiniñ soñuna Qırım müessiseleriniñ aylıqlar borcu 241,5 mln. rubleni teşkil etti. Qırımnıñ öz başına ilân etilgen baş naziri Sergey Aksönov borclarnı 2015 senesi başlanmazdan evel ödemege vade etken edi.

XS
SM
MD
LG