Link açıqlığı

Donetsk ava limanında cenk uruşları toqtamay. Bunı çarşenbe künü, yanvar 21-de, ATO ştabınıñ matbuat merkezi bildire.

«Duşman qarşılıq köstere, lâkin imayecilerimiz vazifelerini becereler. Qanunsız silâlı birleşmeler ava limanı civarındaki Tonenkoye, Peski, Avdeyevka mesken yerleri yanında ukrain askerlerine ateş açalar», – aytıla beyanatta.

Ştab malümatına köre, Lugansk vilâyetinde 29 ve 31 blokpostları rayonında vaziyet deñişmey qala. Boyevikler ukrain askerlerine minaatıcı, top ve «Gradlardan» ateş açalar.

Mariupol civarındaki ATO quvetlerine sıq-sıq ateş açılıp başladı. Gnutovo civarındaki ukrain askerleriniñ noqtalarına minaatıcı, top, tank ve «Gradlardan» sekiz kere ateş açıldı.

Berilgen malümatqa köre, boyevikler Çermalık ve Talakovka mesken yerleri yanında ukrain askerlerine ateş açtılar, Pavlopol ve Pervomaysk civarında minaatıcılar qullanıldı.

Bir kün içinde ATO quvetlerine 72 kere ateş açıldı.

Keçken afta Donetsk ava limanında ukrain askerlerine faal sürette ateş açıp başladılar. Boyevikler kendi saytlarında ava limanınıñ zapt etilmesi aqqında bildireler, lâkin ATO ştabı bu malümatnı red ete.

XS
SM
MD
LG