İşğal etilgen Qırımda «mayıs 3 künü işi» boyunca yaqalanğan Edem Osmanovnıñ adliyecisi Emil Kürbedinov imayesi altında olğan şahısnıñ aqları bozulğanını ayttı. Bunı o çarşenbe künü, yanvar 21-de, Qırım.Aqiqat mühbirine bildirdi.
«Edem Osmanovnıñ qırq sekiz saatlik yaqalavı çarşenbe künü, yanvar 21-de, saat 12.10 bitti, lâkin onıñ işi boyunca mahkeme saat 13.00 ötkerildi. Böylece, mahkeme başlanğanda Osmanov 50 daqqa devamında yaqalanğan olaraq sayılmay edi. Prokuror maşina bozuluvı ve tıqanıqlıqlar sebebinden keç qalğanını bildirdi», – dep ayttı adliyeci Emil Kürbedinov.
«Yaqalav 48 saat devam etse, qarar çıqarılmalı, ya da Edem Osmanov azat etilmeli edi. Mahkeme buña emiyet bermedi. Medeniy bir devlette onı saat 12.10 azat eter ediler. Bu cinaiy esnasnı ve onıñ anayasa aqlarını qaba şekilde boza», – dep qayd etti Kürbedinov.
Aqmescit şeeriniñ Merkeziy mahkemesi çarşenbe künü, yanvar 21-de, oña eki aylıq apis cezasını belgiledi.
«Mahkemeniñ qararına köre, bu adam taqiqattan gizlene, şaatlar ve cinaiy iş ketişatına tesir ete bile, lâkin bunıñ iç bir delili ketirilmedi», – dedi Emil Kürbedinov.
Adliyeci mahkeme qararından şikâyet etecek ola.
Malüm ki, Edem Osmanov yanvar 19-da yaqalanğan edi. Onı Rusiye Federatsiyası Cinaiy kodeksiniñ 381-inci maddesiniñ 1-inci qısmı boyunca («Akimiyet vekiline qarşı küç qullanması») qabaatlaylar. Osmanovnı 2014 senesi mayıs 3-te qırımtatarlarnıñ lideri Mustafa Cemilevni qarşılağanda politsiya hadimine qarşı küç qullanmasında şekleyler.
