Ukraina prezidenti Petro Poroşenko Ukraina ve Rusiye arasında sıñır qapatılmasınıñ ihtiyacını qayd etip, Ukrainadan Rusiye orduları acele sürette çıqarılmaq kerekligini ayttı. Bunı o Davosta Bütündünya iqtisadiyat forumında iştirak etkende CNBC Amerika telekanalına bildirdi, – dep haber ete Radio Svoboda.
«Nevbetteki adım siyasiy dialog olması kerek. Çünki demokratik bir memlekette vaziyetni eyileştirecek yekâne siyasiy adım bar – Ukraina qanunlarına köre serbest ve adaletli yerli saylavlardır», – dep qayd etti prezident.
Malüm ki, Berlinde Donbass zıddiyetini al etüv boyunca «norman formatında» tış işler nazirleriniñ körüşüvi başlanmalı.
RNBO kâtibi Aleksandr Turçinov bildirdi ki, Donbassta 8500 Rusiye askeri cenkleşmekte, Rusiye-Ukraina sıñırınıñ şarqiy qısmında ise tahminen 50 biñ Rusiye askeri cenkke azır olıp tura.
Ukraina ve Ğarp Rusiyeni Donbasstaki separatistlerge qoltutuvda qabaatlay. Moskva bu qabaatlarnı red ete. Moskvanıñ bildirgenine köre, Donbassta Rusiye arbiyleri yoq, lâkin kendi istegi ile cenkleşkenler bar.
