Ukraina halq deputatı, qırımtatar halqınıñ lideri Mustafa Cemilevniñ Qırımğa kiriş yasağı «obyektiv ve adaletlidir», – dep ayttı çarşenbe künü, yanvar 21-de, Rusiyege qoltutqan «Qırım birligi» qırımtatar teşkilâtınıñ reisi Seitumer Nimetullayev, – dep haber ete «Krım Media».
«Menim şahsiy fikrim: Cemilevniñ Rusiyege qarşı küreş ve yarımadanı Ukraina terkibine qaytarmaq içün «Qırım» batalyonını meydanğa ketirmek çağıruvlarına esaslanıp, onı Qırımğa kirsetmemek kerek», – dedi o.
Nimetullayevniñ fikirince, Mustafa Cemilev Qırımda bulunsa, onıñ faaliyeti «yarımadada milletlerara vaziyetni bozacaq».
«O, qırımlılarnı barışıq ve birlikte yaşamalarına çağırsa edi – başqa laf. Lâkin Cemilevniñ çıqışlarında mında yaşağan qırımtatarlar içün qasevetlengenini körmedim», – dep qayd etti «Qırım birliginiñ» reisi.
Nimetullayev emin ki, yanvar 22-de keçirilecek mahkemede Moskvanıñ Basman mahkemesi Mustafa Cemilevniñ Rusiye Federal migratsion hızmetiniñ oña Qırımğa kirişini 5 yılğa yasaq etmek qararını qanunsız olaraq tanılması boyunca davada «doğru ve obyektiv qararnı» qabul etecek.
2014 senesi aprel 19-da Mustafa Cemilev Qırımğa kirip olamadı, çünki onıñ adı kirişi yasaq etilgen grajdanlar cedvelinde bar edi. 40 daqqalıq telefon subetlerinden soñ sıñırcılar halq deputatına pasportını qaytarıp, kirmege izin berdiler.
Aprel 22-de Mustafa Cemilevge 2019 senesi aprel 19-na qadar «Rusiye Federatsiyasına kiriş yasağını» tuttırdılar.
Mayıs 2-de Mustafa Cemilev Aqmescitke Moskvadan uçaq ile kelecek edi, lâkin pasport kontrolinden keçemedi. Kiyevge qaytıp maşinanen yarımadağa yol aldı. Lâkin onı mında da kirsetmediler.
Aynı böyle bir yasaqqa Qırımtatar Milliy Meclisiniñ reisi Refat Çubarov da oğradı.
