Link açıqlığı

Keçken sene memlekette yüz bergen avdarmadan soñ Ukrainanıñ Qırımnı keri talap etmek aqqı yoq, dep tüşüne Rusiye tış işler naziri Sergey Lavrov. Bunı o 2014 senesiniñ neticeleri boyunca matbuat konferentsiyasında bildirdi.

«Cenüp-şarq meselesiniñ kesen-kes Ukraina mustaqilligi ve topraq bütünligi çerçivesinde al etilmesine qoltutqanımıznı tasdıqlayım. Qırım meselesi halqara uquq esasında çezildi», – dep ayttı Lavrov Birleşken Milletler Tşekilâtınıñ nizamnamesine esaslanıp.

«Avdarmadan evel halqara uquq esasında saylanğan parlament tarafından keçirilgen referendum neticesinde ealiniñ çoqusı Rusiyege qoşulmasına qoltuttı, Ukrainada olıp keçken avdarma Ukraina devletiniñ bu topraqnıñ saibi olmaq aqqını yoq etti», – dep ayttı Rusiye naziri.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG