İçki regional meclisiniñ reisi, Qırımtatar Milliy Meclis azası Abmecit Suleymanovnıñ fikrine köre, Rusiye akimiyeti qırımtatarlarnı qorquzuv siyasetini olarnıñ kütleviy tedbirlerge qoşuluvını toqtatmaq içün alıp barmaqta.
Bunı Meclisniñ matbuat hızmeti bildire.
«Yaqında olacaq tedbirlerniñ, yani Noman Çelebicihannıñ hatıra künü, mayısnıñ on sekizi, arfesinde olar qırımtatarlarnı qorqutmaq içün böyle bir «profilaktikanı» keçireler», – dedi Suleymanov.
O, qırımtatarlarnıñ qorquzuvı devam eteceginden emindir.
«Menimce, Rusiye akimiyetiniñ faal qırımtatarlarnı, ilk nevbette, elbette, gençlerni qorqutmaq içün areketleriniñ devamını beklemek kerek», – dep tüşüne Suleymanov.
Yanvar 19 künü Aqmeçit qasabasında 34 yaşında iş adamı Edem Osmanov yaqalanğan edi. Erkekni 2014 senesi mayıs 3-de qırımtatar halqınıñ lideri Mustafa Cemilevni qarşılağanda politsiya hadimine qarşı küç qullanmasında qabaatlaylar. Edem Osmanov Aqmescitniñ Franko bulvarındaki izolâtorda buluna.
Yanvar 21-de Aqmescit şeeri merkeziy rayon mahkemesi oña eki aylıq apis cezasını çıqardı.
Keçken sene devamında uquq qoruyıcılar 2014 senesi mayıs 3-de qırımtatar halqınıñ lideri Mustafa Cemilevni qarşılav tedbirinde iştirak etken 4 insannı yaqaladı. Bundan soñra Edem Ebulisov, Tair Smedlâyev, Musa Apkerimov ve Rustam Abdurahmanovğa qarşı qarar deñiştirildi ve olarnı azat ettiler.
