Ukraina Türkiye eyyetiniñ qırımtatarlarnıñ vaziyetini ögrenmek içün işğal etilgen Qırımğa kelmesine qarşı degil. Amma olarnıñ öz başına tayin etilgen akimiyet ile körüşüvi olamaz.
Bunı Qırım.Aqiqat sayıtna Ukrainada Türkiye elçisi Sergey Korsunskiy bildirdi.
«Biz Qırımğa barıp, er şeyni ayınıqta köre bilecek eyyetniñ yollanuvına qarşı olmağanımıznı Türkiyege doğrudan ayttıq. Amma işbu eyyetniñ Qırmnıñ «resmiy akimiyeti» ile körüşüvleri aqqında laf olmamalı. Bu mümkün olmağan bir şey», – dedi elçi.
O şunı da qayd etti ki, Türkiye tarafı eyyetniñ yollanuvı boyunca öz areketleri aqqında Ukrainanı haberdar etmeli. Şimdilik Türkiye buña azırlıq köre.
Türkiye eyyetiniñ ziyareti, elçiniñ aytqanı kibi, halqara teşkilât, misal içün başında türk diplomatı olğan OBSE missiyasınıñ imayesi altında keçirile bile.
Kiyevge noyabr 10 künü kelgen Türkiye Tış işler nazirliginiñ yolbaşçısı Mevlüt Çavuşoğlu jurnalistlerge Qırım tamır halqınıñ yaşayışına qıymet kesmek içün yarımadağa resmiy olmağan eyyetniñ yollanılacağı aqqında bildirgen edi.
Yaqında Çavuşoğlu Rusiye Türkiyege qırımtatarlar ile bağlı vadelerini yerine ketirmegenini bildirdi.
