Ukraina Tış işler nazirliginiñ başı işğal etilgen Qırım Ukraina terkibine qaytacağında emindir. Bunıñ ile, bu al Rusiye içün elvirşli olacağını da qayd ete.
Bunı Klimkin Twitterde yazdı.
Böyleliknen Ukraina naziri Rusiye muhalifi Aleksey Navalnıynıñ aytqanına seslendi, soñkisi «yarımadanı Şimaliy Qıbrıznıñ taqdiri bekley, amma Ukraina Qırımnı qaytarıp olamaz» degen edi.
«Qıymet güzeldir, amma netice doğru degil. Qırım Ukrainağa qaytır, emin oluñız. Bunıñ ile bundan em Qırımğa, em… Rusiyege fayda olur»,– dep yazdı tış işler nazirliginiñ başı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
