Qırımtatarlarnıñ aq-uquqlarını qorçalav komitetiniñ bütünqırım konferentsiyasına keder etecek olğan bir qaç şahıs belgilendi. Olarnıñ arasında, şu cumlden, olimpik yedek mektebiniñ mezunları da bar edi.
Bunı öz Facebook saifesinde Komitetniñ reberi Eskender Bariyev bildirdi.
«Sport klub ve taqımnlarnıñ idmancıları ile çalışmaq kerek, çünki, kerçekten de, «tituşkalardan» çoqusı nege «ketkenini» bilmey edi. Yuqarıda añılğan şahıslar qaysı bir sport klubına ait olğanını belgilemek kerek», – dep yazdı Bariyev.
Onıñ malümatına köre, tarikçiler sırasında Sudaq, Zuya, İçki, Aqmescitniñ Fontanı mikrorayonında yaşağan gençler bar edi.
«Qırımtatarı (musulman) içün aqılsız ve rezaletli bir areket olğan, yani «vazelinni berüv» vazifesini amelge ketirgen oğlannıñ anası telefon vastası ile Qırımtatarlarnıñ aq-uquqlarını qorçalav komiteti azalarından afu soradı. İçki rayonında yaşağan beş rusiyeli şahıs belgilendi», – dey Bariyev.
O şunı da qayd etti ki, FSB ve MVD, Rusiye qanunlarına köre, qararlarnı qabul etmese, Qırımtatarlarnıñ aq-uquqlarını qorçalav komiteti halqara teşkilâtlarğa muracaat ete bilecek.
«İşbu müessiselerniñ areketsizligi olarnıñ da alâqası bar olğanını kösterecek! Bu ise insan aqlarınıñ qaba bozuluvıdır», – dep qayd etti Komitet başı.
Evel Qırımtatar Milliy Meclis reisi Refat Çubarov yanvar 17 künü Aqmescitte Qırımtatarlarnıñ aq-uquqlarını qorçalav komitetiniñ konferentsiyasına keder etecek olğanlarnıñ adlarını ögrenmege çağırdı.
Bir otuz insan iştirakçilerniñ qayd etüvi keçken binağa sürip kirmege areket etti. Bazılarğa konferentsiyada iştirak etmege musaade ettiler. Qırımtatar Milliy Meclis vekilleri politsiyanı çağırdı.
Bundan soñ sport urbasına kiyingen şahıslar zalğa sürip, konferentsiya teşkilâtçılarına ücüm ettiler.
