Salı künü, yanvar 20-de, «Keriç-Nikolayev» şeerlerara avtobusınıñ seferlerini lâğu ettiler. Qırım.Aqiqat mühbiri aytqanı kibi, yerli avtovokzalda avtobusnıñ lâğu etilmesiniñ sebeplerini añlatıp olamadılar.
Yolcularnıñ aytqanı kibi, keçken çarşenbe künü Keriçten «Keriç-Nikolayev» marşrutı boyunca deñev seferi açılğan edi, bu afta başında avtovokzal kassalarında avtobusqa biletlerni satın almaq mümkün edi.
«Kassada bir şey aytmadılar. Tünevin bilet alıp, bugün yolğa çıqmaq kerek edim – avtobusnı ise lâğu ettiler. Mında zarar körgen bir men degilim, daa yolcular bar, şimdi «Krasnodar-Odessa» avtobusına minmege areket etecekmiz. Amma, o bizni yalıñız Ermeni Bazarğace alıp ketecek, andan ise özüñ bilesiñ»,– dep tarif etti Qırım.Aqiqat mühbirine keriçli Oksana.
Evel bildirilgeni kibi, qırım matbuat vastaları qıtaiy Ukraina ile avtobus alâqasınıñ tiklenmesi aqqında bildirgen edi. Amma soñra bu malümat red etildi.
