DTEK «Krımenergo»nıñ «Ukrinterenergo» devlet şirketine borcu şimdilik 80 million grivnadan ziyadedir. Bunı Energetika ve komür sanayı naziri Volodımır Demçişin salı künü, yanvar 20-de, Kiyevde keçirilgen brifing devamında bildirdi, – haber ete «RBK-Ukraina».
«Bugünge DTEK «Krımenergo»nıñ «Ukrinterenergo» devlet şirketine borcu 80 million grivnadan ziyadedir. DTEKniñ «Ukrinterenergo»ğa umumiy borcu – 150 million edi. Şimdi shema daa da qolay, doğru, añlayışlı oldı, amma siyasiy ceetten problemler bar», – dedi Demçişin.
Evel Ukrainanıñ Energetika ve komür sanayı naziri Volodımır Demçişin işğal etilgen Qırımğa elektroenergiya ketirilüvi aqqında añlaşmada «Qırım federal okrugı» ibaresi yoq olğanını bildirdi.
Evel haber etilgeni kibi, Arseniy Yatsenük energetika nazirligini Qırımnı Rusiye toprağı olaraq tanığanında qabaatladı.
