Ukrainanıñ Energetika ve komür sanayı naziri Volodımır Demçişin işğal etilgen Qırımğa elektroenergiya ketirilüvi aqqında añlaşmada «Qırım federal okrugı» ibaresi yoq olğanını bildirdi.
UNİAN haber etkeni kibi, bunı nazir salı künü, yanvar 20-de, Kiyevde keçirilgen brifing devamında, Nazirler Kabinetiniñ reberligi añlaşmanı tafsilâtlıca ögrenmege ıntıluvından çıqqan qavğanı izaatlap, bildirdi.
«Ukrinterenergo» devlet şirketi ve yarımadağa elektroenergiyanı ketirgen qırım şirketi arasında qabul etilgen añlaşmada Qırım «Rusiye Federatsiyasınıñ federal okrugı» olğanı aqqında yazılmağan», – dedi Energetika ve komür sanayı naziri Volodımır Demçişin.
«Añlaşmada «okrug» aqqında bir söz bile yoqtır», – dedi nazir.
Bunıñ ile Demçişin şunı da bildirdi ki, işbu añlaşma evel qabul etilgen vesiqalarnı tekrarlap kele.
Evel haber etilgeni kibi, Arseniy Yatsenük energetika nazirligini Qırımnı Rusiye toprağı olaraq tanığanında qabaatladı.
