Link açıqlığı

Smedlâyev: Cemilevni qarşılağanından sebep yaqalanğan Edem Osmanov arbiyler tarafından zarar körgenini bildire


Bazarertesi künü, yanvar 19-da, Aqmeçit rayonında yaqalanğan Edem Osmanov Aqmescitniñ Franko bulvarındaki izolâtorda buluna. Onı 2014 senesi mayıs 3-te qırımtatarlarnıñ lideri Mustafa Cemilevni qarşılağanda politsiya hadimine qarşı küç qullanmasında qabaatlaylar. Onıñ aytqanına köre, arbiyler onı yaqalap, oña qarşı beden küç qullandılar.

Bunı Qırımtatar Milliy Qurultayınıñ merkeziy saylav komissiyasınıñ reisi Zair Smedlâyev Qırım.Aqiqat mühbirine bildirdi.

«Edem dedi ki, onı yaqalağan soñ bir qaç kere urdılar», – dep qayd etti Smedlâyev.

Onıñ malümatına köre, yaqalanğannı Rusiye Federatsiyası Cinaiy kodeksiniñ 381-inci maddesiniñ 1-inci qısmı boyunca («Akimiyet vekiline qarşı küç qullanması») qabaatlaylar.

«Edem Osmanovnı sorğuğa çektiler, adliyecisi Emil Kürbedinov da yanında edi. Saat 15-te (yerli saatke köre, – muar.) taqiqat işleri devam etecek», – dedi Smedlâyev.

Qurultay MSK reisi bu yaqalavnı «qırımtatarlarğ basqı devamı» dep adladı.

Belli oldı ki, yaqalanğan kişi Qırımnıñ Aqmeçit rayonındaki qırımtatar iş adamı Mustafa Osmanovnıñ oğlu ola. O, 2013 senesi dekabr ayında maşinanen Kiyevge kelip, numayışçılar içün pilâv pişirgen edi. Keçken sene sentâbr ayında Osmanovnıñ evinde tintüv keçirildi.

Malüm ki, 2014 senesi mayıs 3-te Ermeni Bazarda Mustafa Cemilevni qarşılağan bir qaç kişi SİZOdan azat etildi. Edem Ebulisov, Tair Smedlâyev, Musa Apkerimov, Rustam Abdurahmanov azatlıqqa çıqtılar.

XS
SM
MD
LG